(警告﹕《時事發噏風》開宗明義「發噏風」﹐任何憂國之士﹑衛道之士﹐如睇後有任何不適﹑不安跡象﹐請自行了斷)  
自從煲呔曾推出施政報告之後﹐新聞醜聞一浪接一浪﹐再加上膠登友作歌贈興﹐一眾花生友睇到不亦樂乎…

只不過﹐過癮還過癮﹐事態發展到呢個地步﹐我覺得已經有D傳媒已經過晒火位啦…

施政報告推出後第一日﹐煲呔曾同泛民玩英文捉錯處﹐無聊味十足﹐但作為花邊新聞來講﹐確實唔錯…

之後﹐就爆出所謂慳電膽醜聞啦…講真﹐所謂慳電膽醜聞﹐實在好神奇。究竟點解會爆出﹐煲呔曾個親家會有sell飛利浦慳電膽呢﹖

需知道﹐負責飛利浦慳電膽代理嘅﹐係煲呔曾個親家間公司底下嘅其中一間子公司﹐賣慳電膽根本唔係佢公司主要業務。又事實上﹐全港有十幾個慳電膽牌子﹐飛利浦雖然係名牌﹐但係飛利浦並無係慳電膽市場中構成壟斷…

好明顯﹐呢鋪係有人專登挖料﹐再向傳媒爆料…問題係﹐邊個係爆料幕後黑手呢﹖報紙資料來源係邊呢﹖我地似乎永遠唔知道。

再細心諗諗﹐就會發現﹐今次慳電膽醜聞﹐同當年涼粉蟲偷步買車醜聞﹐乃至之前甘奶西炒人事件﹐又有異曲同工之妙。成鑊野﹐都係令大家覺得有人以權謀私﹐目的係令對方誠信破產﹐最終搞到對方民望急跌…

當年狙擊涼粉蟲﹐其實志在「倒董」﹐呢個已經係人所共知嘅秘密。老董董腳痛落台﹐換上煲呔曾﹐又照辦煮碗﹐整鑊咁嘅野佢嘆…明眼人都睇到﹐呢次其實係「倒曾」嘅一鑊政治炒作…

講真﹐香港自從回歸開始﹐就已經造成民主派同左仔互爭凳仔之局。阿爺任得「反共」嘅民主派繼續存在﹐而民主派又誤以為諗住搞到普選就可以上位﹐而同阿爺扶持嘅特首搞對抗。

所謂「還政於民」﹑「民主自由人權法治」﹐有些少腦袋之人﹐都應該知道﹐係政治鬥爭口號﹐亦只不過係民主派搞對抗嘅「大義名份」﹐令佢地出師有名。正如我地江湖中人﹐口入面都成日強調江湖義氣﹑忠肝義膽﹐作為爭地盤﹑搵著數嘅「大義名份」…

係兩瓣格屎互爭龍頭之局下﹐做唔到龍頭一邊不斷搞局﹑踩場﹐實在正常不過。政治權力同利益在前﹐人人自然爾虞我詐﹗你唱臭對方﹐又點抬高自己﹖你唔做瓜襯家﹐又邊有得上位﹖

所以搞得對抗﹐當然會用盡一切辦法﹐去數臭對方啦﹖當然仲要倒倒下董﹐老董董就腳痛落台﹐搞到外表上好似倒董成功一樣。今次換上煲呔曾﹐仲唔實行照辦煮碗﹐鬥垮鬥臭佢咩﹖

因此﹐我覺得倒完老董倒煲呔﹐其實係意料中事。問題在於﹐見到傳媒日轟夜轟﹐係又轟唔係又轟﹐轟到令人覺得好煩厭!

以《白粉報》為例﹐煲呔曾休假四日﹐都可以寫成「全城追殺 曾蔭權休假避難」…生果報則話係特首休假其實係阿爺忽然「召見」…大佬﹐有人吹下風﹐又無證無據﹐都可以講到似層層﹐去休假又老噏話係避難﹐算點呀﹖

講真﹐你倒曾還倒曾呀﹖你唔好亂噏好唔好﹖好似琴日又有報導﹐話曾蔭權幫佢細佬曾蔭煊同佢弟婦向銀行追討雷曼迷你債券﹐仲拎到十足賠償…講到似層層﹐但之後又話其實係流料。(新聞)人家明明只係賠唔足六成﹐就吹到話有十成…連民主黨何俊仁都係新聞話﹐叫香港市民唔好太敏感﹐係又話利益輸送﹑唔係又話利益輸送…

有D人成日話﹐香港傳媒已經比阿爺收編﹑河蟹﹐但今次倒曾熱潮﹐我就一D都感覺唔到囉﹖全港兩大報﹐輪流發功﹐不斷倒曾...當生果報算係半份民主派黨報﹐唔計啦~~白粉報如果比阿爺河蟹咗﹐何解又大力倒曾呢﹖又邊忽似比阿爺統戰咗﹖

相反﹐從今次倒曾熱潮入面﹐我地可以再次睇到﹐香港獨特嘅畸型傳媒生態。乜報紙唔係應該不偏不倚﹑公正客觀咩﹖點解可以倒曾倒到出晒面﹖可以係頭條絨埋晒「全城追殺﹐曾蔭權休假避難」標語呢﹖立場都出Q晒來﹐公乜正﹑客乜觀呢﹖

事實已經再次證明﹐當年LMF係《闔家伶》入面鬧報紙﹐絕對鬧得無錯﹗
你報導日日淨係亂咁報導﹐失實既手法﹐誇張既內容
血肉模糊分開幾節放係頭版當砌圖
藉口話求事實﹐其實個個爭銷路
有事你地無晒立場﹐唔識公正報導

簡直係真理呀~~香港好多報紙佬﹐真係好很闔家伶呀~~

送多次《闔家伶》比佢地嘆啦!!!